Опубликовано: 04 May 2017

Пельнянен но Герберен тодматӥзы

28-30-тӥ оштолэзе Ижкарын «Туризм. Спорт. Отдых» туризмъя VIII Огъя Росси адӟытон радъяськиз. Ужрадэ Россиысь 46 улосъёс пыриськизы, озьы ик татчы вуизы Китайысь, Финляндиысь, Грузиысь куноос. Ужрадъясьёслэн ивортэмзыя, 30000-лэсь ятыр адями вуылӥз адӟытонэ.

Удмурт Элькунысь йӧскалык политикая министерство Калыкъёслэн Эшъяськон юртэнызы ӵош кык ӵектосэныз тодматӥз - «Гербер» элькун шулдыръяськонэн но «Пельняньлэн дунневыл нуналэз» фестивален. Элькун «Гербер» туэ Можга ёросын ортчоз. Туристъёс татчы вуыса быгатозы удмурт калыклэн вашкала сям-йылолъёсыныз тодматскыны, вӧсям ӝукез веръяны, кибашлыослэсь киужъёссэс басьтыны, удмурт коллективъёслэсь быгатонлыкъёссэс дунъяны, «Ватка» выжы валъёсыз учкыны. Дышем сямен ужлаозы «Усточикар», «Шундэктон», «Шудон азбар», «Кунокуа», «Батыр шудонъёс», «Азвесь геры», «Андан валъёс» площадкаос. Тачы пыриськозы Удмуртилэн вань ёросъёсысьтыз но Россилэн мукет улосъёсаз улӥсь удмуртъёслэн делегациоссы.

«Пельняньлэн дунневыл нуналэз» ӵектос выль на. Туэ со радъяськиз куинетӥзэ, озьы ке но та ужрадэн данъяське элькунмы, угось вакчи дыр куспын со быгатӥз ас котыраз адямиосты люканы. Удмуртиын улӥсьёс понна пельнянь огшоры ческыт но кӧттырлыко сиён гинэ ӧвол, со калыклэн историез. Туннэ нунал понна Удмуртиын тужгес но вылӥ ӟечлыко пельнянь куто. Шумпоттэ но паймытэ соослэн турлы пуштоссы но.



Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,